Nai Oregon Khua Comminuty College ah Minung 9 Meithal Kah in Thihnak An Tonmi ah Ka Lungchung Ummi (Reflection/Thought on School Shooting in Oregon)

Kha ni news ka van rel ah, Oregon, Umpqua Community College ah pakhat pa nih siangakchia minung 9 a thah hna timi thawng cu CCN (Chin Cable Network) ah ka hmuh. Athawng ka van rel. Cun adang website ah an tial mi pawl ka van rel cu ka ngaih a chia taktak. Zei ruangah hme dai te in ca a cawng a cawng ko mi siangakchia hi a thah hna hnga tiah kai ruat. Ka van ruat deuh in ka ngaihchiahnak kha thinhunnak lei ah a kal.

Hi thattu pa nih hin siangakchia lawng si lo in cachimtu saya pakhat zong a thah chih. Cu ti an mah te in ca a chim I a cawng ko mi cu zei ruang dah thah hna hnga tiah kai ruah. A molh le maw si ka ti. Si lo le thluak zawtnak a ngei mi phun maw si hnga ka ti. Thluak zawtnak a ngei mi si ahcun meithal ai ken kho hnga maw tiah ka ruat. Zei ruangah ti si cun thluak zawtnak a ngei mi le a hnu lei caan a chia tukmi (tcn. A hlan ah minung that a rak hmangmi or that ding ah a rak timmi) pawl hi cu license an ngeih ding ka zum lo. Cu bantuk minung cu license pek ding hrimhrim an si lo tiah ka ruah. Hi bantuk hi kan zoh tikah US chungah ah hin thinphang tluk bak in sianginn chung violence hi a kar chin thluahmah. Keimah ka hmuh ning ahcun US government nih hin Gun laws hi a remh than a hau lai tiah ka ruah. Tha tein meithal leicense hi a pek cang hna ah a tha lai. Cu lo cun sianginn kai ah tih phan bu in kai kan hau peng lai.  

Cun thanhca an van tial ning ah Khrihfa a hau mi a lo ngai. Zei ruangah ti si cun biaknak a hal hna I Khrihfa ka si tiah a ti mi paoh cu khah vancung ah dai te in nai din cang lai a ti i a thah hna ti a si. Tih nung taktak mi si tiah ka ruah. Biaknak pakhat cungah thil luan tuk in a ruah si cun biaknak dang cungah minung tam deuh cu huatnak an ngei colh tiah ka hmuh. Hi bantuk kong ah hin cun biaknak cawnpiaktu pawl cung ah rian a um tiah ka ruah. Biaknak cawnpiaktu kan I ngeih mi nih hin biaknak a nunnem ning le ai dawh zia tu hi fiang ten kan thieh khawh nak hnga a ka chimh ding si. Anmah pathian bia chimtu hna I chiatserh hna an hman cun biaknak a hrawh dih lai tiah ka hmuh.

Cun hi kahnak ah a biapi ngaimi tiah ka ruahmi cu sianginn security hi a si fawn. Class luhnak kutkaa kip ah khin weapon detector I bunh seh law a humhim deuh lai. Zei ruangah ti si cun meithal ai ken tiah a larm a rin bak cun ho paoh ralrinnak kan ngei manh cio lai dah tiah ka zumh. Cun cachimtu te nih hin a ca cawn caan a phanh bak in innka hi khar peng hna seh law a tha lai. Hi bantuk kahnak le thihnak kan zoh tik ah hin sianginn security hi tamdeuh a hau cang ti hi cu a fiang ko.