Chin Ramkulh Cozah Nih Hakha University Saknak Ding Hmunhma An Zoh; Artlangzau An Lung A Tling

Kum 20 ringlo Chin ramkulh ah cozah nih university chiah le ceihphai a rak duh bal lomi cu ramkomh cozah nawlpek ning bantuk in August 24, 2014 zingleisml. 7:00-12:00pm tiang Chin ramkulh University saknak ding hmun ah aa tlak bik lai tiah ruahmi Artlangzau cu Chin ramkulh minister le tuanvo ngeitu upa nih an zoh. University hmun ca ah hi tluk tel a si lai tiah cunglei nih an timi nak lengpi in hmunhma a that caah hmunhma zohtu dihlak an lung a tling tiah thawng kan theih.

High Standard Education Department, Upper Myanmar-Mandalay fimcawnnak zungpi in ca a hung phan. Cu ca chung ah biahalnak pahnih an kan tuahmi cu Chin ramkulh ah University um a herh taktak maw timi le Chin ramkulh ah University saknak ding caah a zatawk in hmunhma a um taktak maw timi an si. Kawlram chung ramkulh le ramthen dihlak ah university a ngei rih lomi cu Chin ramkulh pakhat lawnglawng a si. Ramkulh pakhat le khualipi pakhat sinak a tlintertu le limhang a langhtertu ah University ngeih kan herh hrimhrim ko tiah kan ruah caah atu bantuk in hmunhma kan zoh hi a si” tiah fimcawnnak le zatlang thanchonak (Social) minister Dr. Ba Maung nih The Chinland Post ah a chim.

Hi hmunhma zohnak ah Chin ramkulh minister Pu Ngun San Aung, Minister Pu Cin Lian Pau le keimah tel in Hakha khuanu/pa, Hakha peng kaw-tung-kaw upa le ramkulh cozah hmunhma lei rianngeitu an i tel. “Hmunhma kong ah cunglei nih a tlawm bik ekah 150 tal a si lai tiah an kan ti. Kan zohmi Artlangzau hi ekah 200 ringlo hmunhma a um. A hmun aa rem, Hakha khua he zong aa naih, tilaknak zong ah a tlamtling ngai dingmi a si. Fing le tlang umtu ning siseh, farthing le ram belh umtuning hrimhrim nih khua a dawhter khun i a zohtu dihlak kan lung a tling dih. University pakhat saknak ah a herhmi dinti le tilionak tidil tbk. tiang a tlamtling dingmi hmun a si. Mei le ti caah amah dangte hmanh (Small Dam Project) in Nawi tiva khi kham le dil khawh a si” tiah Dr. Ba Maung nih cun a chim.

A luanciami caan ah MP Za Tlem tel in Chin MP hna nih Chin ramkulh ah University sakpiak ding hi Hluttaw tonpumhnak ah an chuahpi pin ah nu le pa, siangngakchia nih hal lengmang a rak si. Asinain a ruang phunphun kawl in biatung thlukpiak lengmang kan si. Chin ramkulh ah University um a herh maw herh lo timi kong ah “University timi hi phun tampi in a um. A tlaangpi in a um khomi (4) cu 1). Art & Science lei cawnnak University, 2).Comprehensive University (mahte in cachimtu i auh in cawnnmi University), 3). Kawrawn le hmundang (ramchung) ah a um rih lomi cawnnak University (tahchunhnak ah Social Protection Major tbk.) 4). Kawlrawn le hmundang ah tlawmte lawng a um i cawnnak sangdeuh a simi University (tahchunhnak ah; Medical University, IT tbk..) hi an si. Chin ramkulh ah hin University um a herhnak caan a sau tuk cang. Ramkulh pakhat a sinak hngalhternak le limhang a ngeihnak hrimhrim ah University cu a um a herh” tiah Dr. Ba Maung nih CLP sin ah a chim.

Chin ramkulh caah zeibantuk University dah aa tlak bik lai timi CLP nih Dr. Ba Maung biahalnak kan ngeihmi cung ah “kei ka ruahning ahcun Medical University hi Kawlram chung ah pathum lawng a um rih. Cucaah Hakha ahhin Medical University a um khawh ve ahcun sii lei thiamnak cawn a duhmi tampi an hung kai hrimhrim lai ti a fiang. Cucaah hmundang ah tampi a um lomi cawnnak sang University phun hi aa tlak bik ti ka ruah. Rangoon Medical University ah cun tanghra awnnak mark 500 tlin lawng ah kai khawh a si. 

Mandalay Medical University ah mark 480, Magwe Medical University ah mark 450 in an lak hna. Cu bantuk in Hakha ah Medical University a um ah cun mark 420 in an lak a si ah cun Chinmi chung in siseh Kawlrawn zong in minung tampi nih medical fimthiamnak lei an cawn khawh lai” tiah Dr. Ba Maung nih a hmuhning a chim.

Hlan liopi in nihin ni tiang ramchung ramleng kan mifim thiam le kan pale hna nih Chin ramkulh University hmun caah ruahnak an kan pek tawnmi cu ti le mei a that bik nak hmun hi thim khawh i zuam uh ti a si. Cu tikah lungkil in ruah tawnmi le rak ngiat lengmangmi hmun cu atu Artlangzau le Haithlanrawn pi hi an si. An pahnih in an tha veve. Amah balte cu khuapi a kauhter deuh ding le Hakha khualipi sinak muisam le limhang a langhter deuh dingmi ah keinih cun Haithlanrawn hi University dirhmun ah cun ka duh deuh. Cun zei bantuk university dah Chin ramkulh caah aa tlak bik a si lai ti ah cun a pakhatnak a simi Art & Science University phun hi ka duh pin ah kan herh bikmi a si” tiah Pu Siang Mang nih the Chinland Post ah a chim.

Pu Ral Kham nih University hmun le a phun kong ah bia kan hal i a kan lehmi cu, “University hmun caah Haithlan hi a tha tuk nain vawlei hmun kan tah i ekah 105 lawng a si. Atu Artlangzau hi a tlawm bik ekah 220 tiang hmun a um. Cucaah, Chin ramkulh Hakha khualipi caah Artlangzau hi a tha bik le ka lungtling bikmi hmun a si. University phun ah cun Art & Science University hi Chin ramkulh caah aa tlak bik a si lai, a duh zong ka duh bik” tiah the Chinland Post ah a chim. – The Chinland Post