Thantlang Peng, Sihmuh Khua Siang Innn Kai Liomi Ngakchia Kum 12 Nute Tlaihhrem A Tong

           

       February 03, 2014 ah Chin ramkulh Thantlang khuapi i kum 12 sianghngakchianu te a tlaihhremtu siangcachim pa cu atu tiang an tlai kho rih lo, tlaih ding in an kawl cuahmah lio a si.

         Thantlang pengkulh, Sihmuh khuate ah siangcachim rian a ṭuanmi Primary Saya Thawng Bik (kum 32) nih tangnga a kai liomi nu te cu a tlaihhrem i, a zaam tak tiah Thantlang inntek khuami pakhat nih a chim tiin Khonumthung news nih a ṭial.

           

          “Kan theih tawk ahcun Saya pa nih hin sianghngakchianu te cu an inn ah zanriah dingin a auh. Cu zan ahcun a tlaihrem beh. Hngakchianu te nih cun a chimngam lo. Hliamhma in a thi tamtuk a chuah caah a chungkhar pawl nih an hal hnu lawng ah an theih” tiah khuami hna an chimnak in theih a si.

            Sianghngakchianu te cu February 04, 2014 ah khan Thantlang cozah siizungpi ah an chiah, Siangcachimtu Thawng Bik cu February 04 zinglei in a zam i nawlngeitu hna nih an kawl len ko nain atu tiang an hmu kho rih lo.

            “Saya pa hi a chungkhat fapa te he a um ṭimi an si. Cu zan ahcun hngakchianu te cu a auh i, leng ka ka chuak rih lai, ka fapa he hin tuzan cu rak it u awh tiah a chimh ta. Cu ti a chim ruangah cun hngakchianu te zong nih a riahnak a si” tiah khuami hna nih an chim chap.

            Cun “Saya pa nih cun hngakchianu te cu ahohmanh chim hna hlah a ti, a thi tamtuk a chuah caah thil sining cu theih” a si. Saya Thawng Bik i a nupi le a fanu fapa (3) hna cu Thantlang khuapi an khua an sa i, amah hi siangcachim rian in Sihmuh khua ah a umnak kum 7 a si cang tiah theih a si.

            Hi kong a tawlreltu Thantlang police sakhan nih Pohmah 376 in sual an phawt ko nain khuasualhuattu cu atu tiang an tlaih khawh rih lo caah case an awng kho rih lo, cucaah police sakhan ṭuanvo ngeitu hna nih khuasualhuattu nan hmuh a si ah cun 070-6005 ah nan rak kan chimh colh lai tiah thanhnak an tuah. –Global Chin News