Thantlang Ah Cozah Riantuantu Hna NIh A Hlei In Tangka An Hal Hna

          Chin ramkulh, Thangtlang khua um mintheih a si lomi cozah rianṭuantu pahnih cu cozah lei ca chuahpiak nak ding caah tangka an hal hna i sual phawt an tong tiah theih a si.

             Hmatpungtin zung le Milurelnak zung, Innlo dirhnak lei rianṭuannak le lam lei tawlreltu zung rianṭuantu pawl nih ram mi sinak sawknak (Hmatpungtin) ding le chungkhar pakhat sinak (einthoungsu sazin) le lei gram tuahnak caah a hlei in tangka an hal hna tiah theih a si. Thangtlang khua ummi, a min a langhter duh lomi pakhat nih Chin Human Rights Organization (CHRO) sin a chimnak ahcun, Hmatpungtin (rammi sinak card) sernak caah kyats 5,000 pek a si i pungsan-10 lak duh ahcun a man tak cu kyats 2,000 a si tiah a chim.           Hmatpungtin thlen duh tikah, si lo le a ṭhing kha a thar ah thlen duh ahcun kyats 10,000 tiang an hal hna i a thar bak ser ding a si ahcun kyats 30,000 le 40,000 tiag an hal hna tiah a chim chap.

        Hi kong he pehtlai in hmatpungtin zunglei rianṭuan tu nu pakhat sin i thawng hlat tik ah, cozah ret leng in a hleihluat in kan hal hna lo, a pe khomi nih lakphatti man ah tiah kyats  2,000, 5,000 ti bantuk in a kan pek tawn, mah hi kan mah nih kan hal mi hna a si lo tiah a chim. A ngei lomi nih a kan pe lo. A sina bel in kannih nih cun mi pakhat caah kyats 2,000 kan lak hnanak a ruang cu kan khualtlawnnak le khuakip kan kalnak caah a si. A fiangmi cu tangka a ngei lomi nih an duhmi a ngah ve lai lo, an duhmi lak an duh ahcun cozah khiahmi zat pek a herh, an herh caan  i an duh mi kan tuahpiak hna tikah lunglawmhnak caah tiin tangka cawih chawm in pek zong a herh lo tiah a chim chap.

           Thantlang khua hruaitu pakhat nih cun, “Zei ruang ah dah Form-103 le Form-105 (lei gram) caah tangka an kan hal ning aa dan cio hnga, a taktak ahcun hi thil hi innlo dirhnak ca le lam zohkhenhnak buu nih chuah piakmi a si ko nain an kan hal ning a dang cio mi hi kaa fiang lo,” tiah a chim. Hi bantuk  bia fiang lo caah cozah hotu lei nih an lehnak ahcun, hi bantuk form laknak caah a hlei in tangka kan hal hna lo, an mah tein lakphatti man tiah a hlei in an kan pekmi a si ko tiah an leh hna.

            Hi kong ah fiang tein theihternak a um lo “lunglawmhnak” caah ti in tangka an phalh hna zongah a caan ahcun an tuah piak kho hlei hna lo. –Chinland Guardian