Manipur Ah Chin Ralzam Hngakchianu An Tlaihhrem, An Thahbeh

                January 7, 2014 ah Chin ralzam hngakchianu, kum 5, Thantlang khuami an tlaihhrem i, an thah beh. Hringtu a pa nih ka fanu hi an fir, an thlaihhrem i, an thah beh tiah lunghrinh nak bia a chim tiah Imphal Times nih a ṭial.

            Churachandpur District Hospital ah siibawi nih a ruak an hlai i, Dr. Thari nih faaktuar takpum ah nam sawhnak hma hmun 5 ringlo le chungril hliamhma faak tuarnak an um tiah result a phuan.
            Hngakchianu cu Zin Zin Moo @ Yin Yin Moe, a pa Moo Win, Thantlang khua, Chin State, Myanmar tiah Imphal Times nih a ṭial. Phualva Times.com, Hmasawnna Thar nih an ṭial ning ahcun Churachandpur police nih, hi kong he pehtlai in, Lalnunnem Hauzel, kum 32, Ngathal khuami an tlaih tiah a ti.
            Faaktuar chungkhar hi kum 2000 ah Churachandpur, Manipur State ah UN ralzam dirhmun in a lutmi an si tiah Imphal Times nih cun a ti.
            Hi case kong hi buaipi dingin local police sinah phanhpi a si cang. FIR No.4 (1)2014 CCP PS U/S 302/377 IPC in registered a si tiah Hmar Facebook Group nih a ṭial. Police bawi OC nih a chim i, "Cozah i ṭhithruai nak lei ah daithlan nak a um citcet ahcun, cei taktak in dantatnak kan kalpi lai" tiah a ti.
            Hi thawngpang a theimi Delhi Chin ralzam community thinlung a nuam lo. Pu Tin Duh Thang, Delhi Chin Comminities Fellowship President nih, "India ram, khuazei hmanh ah Chin ralzam kan him loning cu, hihi a si ko. Kaakip um Chinmi nih kan ngaihchiatnak langhter loin, zoh sawhsawh ding hi a poi ko" tiah a chim. – Global Chin News