Sang Hruaitu Nih Chin Pastor Pa A Hmai Ah A Bengh

          Dec. 3, 2013 : Arakan ramṭhen Myebon khua ah Chin pastor Cing Pian Langh cu a ruang fiang loin sang uktu pa U Hla Kyaw nih a hmai ah a bengh.

         Mah hi thil hi November thla ni 9, 2013 zanlei nazi pa 9 le cheu hrawngah kum 30 a si mi pastor pa cu telephone a chawnh lio ah bengh a ton hi a si tiah Chin Human Rights Organization (CHRO) sinin theih a si.

        “Phone line a fian deuh lo ruangah hauhruang kam ah ka dir. Mah cu phone ka chawnh lio ahcun U Hla Kyaw timi pa nih a dahmei in ka hmai ah a ka ceuh i zei bia hmanh chim loin a ka bengh” tiah a chuahkehnak khua Tedim peng a simi pastor Langh nih cun CHRO sin ah a chim. 

         Myebon khua i General Administration Department zungah ka va report nain mah cu ka zunguk bawi khual a tlawng tiah an rak ka ti.

       “Department of Religious Affairs (Biaknak lei Vuanci Zung) ah mah cu thil sining cu thawngthanhnak ka tuah nain an zung bawi nih mah hi cu keimah rian a si lo tiah a ka leh” tiah pastor Langh nih cun a chim chap.

Nawlngeitu lei nih mah hi thil sining kong ahhin zeihmanh cawlcanghnak an ngei lo tiah bengh a tongmi nih cun a chim.

        Pastor Cing Pian Langh cu Evangelical Free Church of Myanmar nih 2013 October thla khan missionary ah rak thlahmi a si i Arakan ramṭhen, Sittwe peng kulh, Myebon khua ah a ṭuan lio mi a si.

2010 October ah Myebon khua hi Giri Cyclone thli nih a rak hrawh bal. Myebon khua ummi minung i zatceo hi cu Chin an si tiah an ruahdamh. – Chinland Guardian