Malaysia Um Rawn Chinmi An Lung A Faak

            Atang i ca hi Salai C.Van Lian Cung (Salai C.vanliancung@gmail.com) nih YCCF biaruahnak ah a rak thlahmi a si.

Dear Upa hna,

Kan ruahpi cio uh. Chin National Day ah Rawn Chin kan lung 
a faak. Thil sining le kal ning zong kan chim uh. Kanmah Malaysia i ummi nih cun zapi theih dingin cathlah kan duh ko hih. Thil nan theihmi, Tlangcungmi le Kawlrawnmi i pehtleihnak kan chim uh. Nan cakan hngak lai.

Upatnak he,

tiah a ṭial i a ṭialmi ningte in a tang lei ah ka van langh ter 
lai.

Rawn Chin (Kawlrawn ummi) Kan Lungfaak Hrim Ko

            Acung lei catar bantuk in Malaysia um Laimi lakah Rawn Chin, Kalay valleys a bikin Kyarinn-Hakhaley-Khampat CND (Chin National Day ) lentecelh nak ah i tel an kan senh ve lo i kan lung a faak tuk. Kan nih Rawn Chin nih kan i ruah bikmi le kan lungpuk cu tlangcung um kan nu kan pa Laitlangmi nih hin an kan kawl lai i, an kan sawm lai i, hmunkhat te ah kan i fontom hna lai i, fek tein kan dir ṭi hna lai ti hi kan lungput a si. Asinain Rawn Chinmi phenheinak an ngeihmi hi kan ruah ah kan ngeih a chia tuk hringhran.

            CND lentecelhnak ah i tel le i tel lo kong cu um rih seh. Mah hi CND hi Laitlang ta lawng maw a si ne? Kan nih rawn i ummi Laimi pawl nih teh kan i hrawm kho ve hnga lo maw? Mah ti i an kan thlaidanmi hi hi hnu hmai leiah rawn i ummi Laimi le tlang i a ummi Laimi kan i ṭhen thai lai tinak maw si ne hnga? Tlangcungmi le rawn i ummi Laimi hi, kan nih rawn um Laimi nih cun i ṭhen kan duh lo. Asinain tlangcung um mi nih nan kan phenhei caah nan kan ti ning tein i ṭhen thai maw kan hauh ne lai.

            CND lentecelhnak kongah, CCFM (Cho Christian Fellowship Malaysia)biakinn ah lentecelhnak kongkau le lente ai celh dingmi meeting an auh. Date 14.12.2013, Time 3pm to 5pm, kan nih cu sawm zong kan tong lo. Kan hnu kum 2012 ah zaangfah tein kan i tel ve ko lai kan ti hna i, aw a ngah ko an kan ti. Cun tangka puaisin luhnak caah RM1200 a hau lai an ti i mahcu pek kan van timh tikah nan nih cu a ngah ṭhan lai lo tiah an kan let ṭhan. Zeiti ṭha lungsau tein um ko rih sih kan ti. Tukum ah CND caah cun meeting ṭhut dingin ca an thlah tikah ca chungin an phone number ka lak i ka chawnh hna. Na email ka kua law meeting auhnak ca kan kuat lai a ka ti caah ka mail cu ka kuat. Meeting cu kan hung kai i, a nih Rawn Chin kha an lung zapi an rak tling ti lo. Meeting kainak hmun Cho Christian Fellowship biakinn kan phak hnu ahcun Rawn Chin lentecelhnak kongah vote kan lak lai ti si. Ka dir i ziah mah cu a phung si ṭung lo. Meeting zong nan kan sawm ve i kan phan cang. Kan kong vote lak ding le ceih ding simi cu ziah kan mah umlo kar ah nan rak ceih lo? A ngah lo ahcun ziah meeting zong rak kai hlah uh nan kan ti lo ka ti hna. An ka let lo… meeting kai mi chungin an nih cu telh lo (ပယ္) ah chia ko hna uh tel a hau lo ti si. Ka dir ṭhan i Rawn Chin um mi pawl Malaysia ah kan cawlcangh ning tete ka chim dih. Cun CND ah i tel ve kan duhnak lungthin zong ka chim chih. Kyarinn pa he meeting cu kan kai i amah zong nih a chim ve.

            Bia pakhat an rak chuah ṭhan i, Rawn i ummi cu Hakha in an holh ko caah Hakha ah i tel ko hna seh ti si. Ka dir ṭhan i a si lo, Hakha cu kan siko nain Rawn ah chuak mi kan si caah i fonh cu a har ngai dakaw ka ti. Cuti i Hakha peng le Thantlang peng / pengtlang in chuah ding a si ahcun kan nih zong Rawn Chin in chuak loin khampat /Kyarinn/Hakhalay tiin kan chuak ve lai ka ti. Asi kho lo puisin a tamtuk lai ti si. Ka dir ṭhan i mah cu caah dakaw kan nih cu Rawn i a ummi Laimi kan siko i hmunkhat te ah kan i fonh lai i team khat lawngin kan chuak lai kan tinak si cu ka ti. Chairman nih kan chim cia bangin vote in kan lak lai an tlak si le a piat lai ti si. Kyarinn pa he cun kan dir i Upa pawl nan thil tining hi a hman lo. Kan mah um lio i vote lak zong a ṭha lo. Thil dawhcah zong a si lo. Cu caah cun kan nih cu kan i tel lai lo hmailei ah khuafak piin ruat uh CND hi Laimi dihlak ca dakaw si kan ti i kan chuah tak hna.