MAHHNGALLO THLAPA

            Zanlei suimilam pa 5 hrawng in khuadawm nak pipi an hung chuak, duldul...dullll tiah khuari a tur, vuichip tlang lei zoh ah zukzek zukzek tiah mimtlau a lek. Khua muih a cu rih lo nain a hung mui khupmap. Can tlawmpal ah puppep puppep tiah kutpi tiatia in ruah var nawn pipi in an hung tla. Lahva kuang lei in tilian thawng bang hung huung huuuggg... tiah thlitu tom zual ko tlik in a hong tli. Chikkhatte ah ruah he thli he rial he a a huai bak in an van i huai. Inn chung dai tang ṭhut ko hmanh ah a ho holh ngam um hlah. Dai dipdep te in kan ṭhu dih.

            Caan tlawmpal ah ka ṭhutnak in ka tho duak i hi tluk thlitu, rial le ruah thawng thangmi hi ih diam i puan lu khuh taak ah a ṭha lai ka ti i ka ihnak khan lei ah lo diam ka kal. Ih i puanlu khuh zongah a thawng cu dai hlei hlah keimah lawng puan tang i thawng van ngaih ko ah ṭihnung tuksapur chin khi a lo. Sinain kai theih lo kar ah ka rak i hngilh diam. Ruahsur puanlukhuh ih cu mitkuh a rak thaw rua kai hngilhnak in kai ṭhangh ahcun khuangteriit awnh thawng dah ti lo zei thawng hmanh a rak leng ti loh. Suimilam ka van zoh cu zan suimilam 10 tlinnak ah minute pa 7 lawng a rak i duh. Cu lawmmam tak cu dah ka ti i ving tiah ka van tho. Kha tluk ruahpi tuk le thli le rial nih thingkung ramkung vialte le innlo vialte zong a hmal dih ko lai lo maw ka ti i thlalangawng in khua ka cuan. Ka khuaruah a har. Zan suimilam pa 10 deng a si cang nain ceupum in a rak um. Vuichip tlang, lahva kuang hrawn le inn pawngkam thlanmual tiangin an lang dih. Thingkung ramkung hna cu faruahthawh nih cei zikzek te in a den hna lai i an mal dih cikcek lai tiah ka ruahmi cu ruahsur le thli hraan nih a rak hmal kho hna loh ruah sur lio i ruahti an hnah cungah ai dilmi tu nih khan an ṭamh lehlam hna i fing le tlang cuanh ah lungvar mansung lawng te hlah maw an si ti awk in tleu dildel tete in an lang. Khua a piang, thawng a dai. Uico hmanh ruah tuk le rial nih an ning a ṭihter rua hna a ho awn-au um hlah. Cu tluk ceu lawmmam cu zeihme si ka ti, cunglei ka van zoh cu a khoimaw ka tete ah khuadawm nak tlawmpal tete ruah in a sur thlu lomi le khuadawm raang tlawmpal tete lak ah thlapa pi cu keimah hi ai dawhcem ka si ti phun khin pumvuai in lulei banvawr in a rak chawh hnawh len hna. Arfi zong pahnih khat tete cu ṭhep dilhdelh tete in an um ve nain thlapa ceu nih a iap deuh hna i an ceunak a lang kho tuk loh.

             Cutluk thlapa dawh cu ka ti ka zoh ah ka zoh cim loh. Lulei banvawr in ai chokphu na si tak ko ka ti i van cau cun ka zoh peng. Cu lio ah ka lung ah duk tiah a hong chuakmi cu hi tluk dawh hi zeitinthla a ceuning si hnga tiah khua ka van ruat. Kan hngakchiat lio sianginn kan rak kai lio i kan rak cawnmi “thlapa cu a mah te in ceunak a nei loh” timi ka lung ah a hung chuak. Ninu nih a ceunak a hrawmh chommi si ti kha ka lung a hong piang vuaimai. Mah cu hnu thlapa ka zoh ah a mah ceunak a si loh Ninu nih a ceunak a hrawmhmi zeithei loin a mah dawhnak ah a rel sual le ai uanthlarpi ti phun khin ka hmuh cang i ka zoh ah ka ning a ka zahter cang. Aw Ninu hi chun i ceunak a kan pek hnu zongah zan ah khua an hmu sual lai lo tiin zan tiangin a ceunak a kan hrawmh ka ti i thlapa dawhnak hmu ti loin Ninu vel ngeihnak lawng ka lung ah a chuak i thlapa ai dawhnak ka hmuh ko nain Ninu dawhnak in ka lungin cun ka hmuh caah Ninu cu ka thangṭhat hringhran. 

            Kan cathiang chungah kan hmuh bang zeizong vialte hi Pathian lamkaltu an si taktak ko. Kannih minung hna zong hi kan biakmi kan Pathian nih mah le sining cio in fimnak, thiamnak le thiltikhawhnak pahrang a kan pek. Amah kan Pathian fimthiamnak le thiltikhawhnak a kan hrawmhmi a si ve. Thlapa i a ceunak le ai dawhnak cu Ninu nih a hrawmhmi a si. Amah thlapa nih zeihmanh ceunak le thiltikhawhnak a ngei loh.

            Kannih minung zong nih hin kanmah te in fimnak, thiamnak le thiltikhawhnak kan neihmi pakhat hmanh a um loh. A kan sertu kan biakmi kan Pathian nih a kan hrawmhmi a si caah kanmah le kanmah i thangṭhat, i uanthlar i i phorhlawt ding kan nei lo. Kan biakmi kan Pathian tu kan thangṭhat deuh ding a si. Kan thiltikhawhnak pahrang cio hi a kan sertu kan Pathian caah siseh, ram le miphun ṭhanchonak le pakhat le pakhat kar ah remnak, daihnak sertu kan si dingmi hi a kan tinh piakmi a si ruangah mah le sining cio in thiltikhawhnak a kan pekmi a si. Thiltikhawhnak pahrang a kan pekmi hi midang sin i i phorhlawt pi dingah kan ruah sual ahcun mahhngallo thlapa bantuk kan si sual hnga.- Daniel Pa