CRC(Malaysia) Zung Nih An Rianṭuantu Pahnih An Chuah Hna

                    November 20, 2013: Malaysia ralzaam caah rianṭuantu bu a simi Chin Refugee Committee (CRC) zung rianṭuantu pahnih hna cu CRC rianṭuantu sinak in phuah an si tiah CRC EC rianṭuantu pakhat nih a chim. An phuahmi hna hi Chairman a ṭuan liomi Salai Khia Thang le CRC card a tuahtu Kim Kim hna an si. Malaysia UNHCR nih register a tuah liopi a si i, Mi – E Fellowship an luh ni ah Mi – E Fellowship in minung 10 hna cu nan card va thleng ta uhlaw nan thlen hnu in kan in luhter hna lai tiah UNHCR zung rianṭuantu lei nih an ti hna. Card thlen dingin CRC zung an kal tikah card tuahtu Salai Khia Thang le Kim Kim zung an kai lo, sml 11:00 am ah zung an phan i, Mi – E Fellowship in card thlen ding minung 10 hna cu card an thlen manh ti lo caah UN lut kho loin an um.

            Mi – E Fellowship rian ngeitu lei nih CRC zung lei cu nanmah nih mipi zei nan kan rel lo

ruangah a lut kho dingmi minung 10 lut kho loin kan um tiah an va ti hna. Cu tikah CRC EC upa hna cu November 16 ah meeting an ṭhu i, CRC cu mipi caah rian a ṭuanmi kan si, mipi upat loin le mah duh ningin a um mi cu by – law bantuk in an rian dinhter siseh tiah biachahnak an tuah. Salai Khia Thang hi CRC Chairman Pu Ṭhuam ramthumnak a kal caah amah ai-ah thimmi a

si i, Chairman a ṭuannak thla hnih/thum hrawng lawng a si rih. Cun CRC by – law ah zung rianṭuantu pakhat nih zung a kai khawh lo ahcun OB pakhat khat sinah theihter siseh, a theihter lo ahcun a kong ceih siseh ti a um caah by – law ningin an kong kan ceih hna hi a si tiah CRC rianṭuantu pakhat nih cun a chim. - The Chin Star