Chin Ralzam An Umnak Hmunhma Ah Kir Ṭhan Kho Dingin Cozah Sin Äh Ca Kuat An I Tim

                 Ralkap cozah chan in nuhrin covo buar ruangah ram chuah takin ralzam dirhmun in ram lengah a um mi Chinmi hna caah ram chungah kir ṭhan khawh nak ding caah cozah thar sinah ca kuat lai tiah Chin National Conference tawlrel tu U Lian Tawi Thang nih a chim.

            November thla chungah tuahmi Chin National Conference he pehtlai in December ni 5 ni ah Rangon Summit Park View Hotel ah tuahmi thawngla pawl thawng fianhternak tuah mi ah a chim tiah theih a si. “Ramleng a um ralzam pawl ramchung an rak kir i an caah a humhim ko cang ti mi dirhmun tiang cozah nih a tuah piak awk a si tiah a chim chap. National Conference i biakhiah mi a hram an dirh khawhnak ding caah committee cu 2014 February thla ah an dirh lai i, ralzam pawl ramchung an rak kir ṭhan kawhnak ding cu hmasabik ah chiah dingin cozah sin na nawl lai tiah Salai Izak Khin nih a chim.

             Chin National Conference cu Chin ramkulh Hakha ah November 12 in 15 tiang an tuah i Chin ralzam pawl an um nak hmunhma ah an rak kir ṭhan kawhnak ding kong telh in biatung pi 13 an rak chah.

            Zei raungah ralzam kan si ti ahcun cozah lei in uknak ṭhat lo ruang, thlaidannak a um ruang le nu hrin covo an buar ruangah ralzam a rak um ve nak a si i, cu ralzam an umnak hmunhma ah an rak kir ṭhan khawhnak ding caah tuah sernak in a chuah pi mi ramdeihnak le hnangamnak a um awk a si tiah zapi hnatlak nak kan ngei kho ti cu November thla i tuahmi Chin National Conference nih thawng an thanh.

            Ralzam dirhmun in ramleng a phan mi Chin mi 120,000 an um i, Malaysia ah 50000 an um, India ah 70000 le Thailand ram ah 500 renglo an um tiah cu coference i chuah mi ahcun aa ṭial.-Myahwaddi