UNHCR Card A Thli In Tuah Mi Puaisa Pa A Zam

Malaysia , Cheras maluri a ummi  Eng te cu UNHCR card tuahnak ding in an pek mi tangka he a umnak theih a si ti lo. Amah hi kum(30) hrawng hrang a si i UNHCR card a ngei lo mi pawl sinin tangka pek in UNHCR card a tuah piak tawn hna.

            YCCF ah Pa Tum nih cun ;Malaysia ah, Ralzam dirhmun in harsa tein, kan um  cio hna, Tlaih le khih a tam tuk tikah, zeitindah UN ah kan luhkhawh ve lai, tihi a lamkip in kawl cio cu a si.Cu lio ah a liam cia kumhnih hrawng in , UN officer hna le Laimi Puaisa hna nih, a thli tein Phaisa pek in, UN luhnak an rak tuah ziar. UN zung lei riantuantu nih, UN luhnak ah phaisa piakhat hmanh rak la hna hlah uh, an la mi hna an um ahcun, report rak tuah uh, tihi an bai a si, a sinatein an mah UN officer lila nih Phaisa pekin, UN ah mi an luhter.

            Ka nau pa  UN luhnak ding ah Laimi puaisa Pa Eng A an timi Mizo holh le Falam holh a hmang mi pa nih a tuah tiah an kan chimh i, kan settuai. Ka Nau nu pakhat nih, May thla ah,(Campion Night Clup) Pawng i, Lai rawl dawr ah, Rm 2000 a pek. Ni 45 ah, UN card na ngah colh lai a ti. A zapite in pek ding cu Rm 4000 a si i  Rm 2000 lawng kan pek chung. A nithla cu a vungphan, hmaithla ni 9 ah aa fiang lai a ti, Hmaithla ni 9 cu a vung phan than, Hmaithla thar ah a fiang lai a kan ti than.

            Cu ti cun a kan hlen lengmang tikah voikhat cu kan i si,  UN luhnak kan beisei ti lo, a tangka in kan khirh ka ti i, a thin a hung, A ka timi cu Ka pupa sin ah nan mah tein nan i hal lai i, nan ngah lo le ka thei ve lo a ka ti. Na Pupa sin ah Phaisa kan  pe lo, nangmah kut ah kan in pekmi a si na kan pek lo a si ahcun , UN office ah kan i tong hna lai tiah ka ti ve.  ka ti tthanmi cu, “ na duhnak hmun paoh ah a ngah tuk, khoika dah si lai?,” tiah a ka ti i, a phone a thah, TlawAmpal ah a ka call tthan i, ngaihthiam a ka hal. Tha tein kan i chawn tthan. “Hi bantuk rian hi kei mah lawng nih a tuahmi ka si lo,”. Agust ni 12 ah a fiang lai a ka ti tthan, cu ni ah a fiang lo ahcun, a phaisa in kan khirh ko hna lai a ka ti. Cu ti cun kan bia cu kan dih ter,, Agust ni 11 tiang cu a phone a ngah i Agust ni 12 a phak in a phnoe call khawh a si ti lo. Atu cu Agust ni 15 a si cang. A phone number cu +6010-890-7204 a si. Maluri ah a um an ti.

       Tuan ah a mah sinah a rak i tuah mi pawl hi UN card an hmu cang. Midang zong a mah sinah aa tuahmi an um rih,  an call kho ve ti lo. Hi kong hi UNHCR ah chuahpi ka timh cang,

UN officer hna zong a tthih hna lai, Kan mah Laimi zong a kan ttih lai. Cucaah, Zung ah ka chuahpi hlan ah CRC, FRO tbk ah ka kal hmasat ah maw a tthat lai? tihi, Ruahnaak zong kan hal pah hna, tiah ca a thlah.

            Hi pa nih nih midang nih UN card tuahnak ding caah tangka an pek cia mi zong tampi a um ti zong thawng theih a si. Atu ah hin minung tam ngai hlei zong hlei mi ah an i tel ve .A dang pakhat nih cun , “ Maluri ah a um an ti le a umnak inn ah kan va kal. A inn a umnak hna nih cun a kal nak kan thei ve lo a kan ti,” tiah  chim ve. Eng A hi a mah lawng hi rian a tuam mi a si lo caah a mah he a pehtlai mi pakhat khat nih a va dem chim zong a si kho. Cun a mah nih tangka duh ruang ah tangka vial te he a zam zong a si kho tiah ruah khawh a si.

            Malaysia kan um chung ah UN card cu Laimi nih cun kan herh ngai ngai mi a si. Ram dang a len duh mi zong si hna seh, A len duh lo mi zong nih mah humhin nak caah kan herh ngai ko nain hi bantuk a thli in thil kan tuah lo hi cu a tha deuh lai.  UN lei nih an theih tik zong ah a tha lo. Kan mah thotho nih kan ing thiamthiam ko lai. Hi kong hna UNHCR office a phak sual a si  i a tu an tuah ding mi Asylum-seeker card pek ding hna a nuarh ter kho zong chim khawh a si lo. -Seihnam